Одахн нег Алиса Супрунова гидг юмн һарч ирҗ. Орс гергн талдан келн әмтнә ду дуулад, мөңг олҗах күн. Өдгә цагла юн болвчнд нершл олад һарһчкна. Эн йовдлд бас нершл бәәнә – культурная апроприация гидм. Талдан келн-әмтнә зөөр, сойл эдләд арсм көөсн юм темдглдг. Зәрминь «Энтн мана сойл делгрүлҗәнә» гиҗ келхм. Тиим болхла, тер келн-әмтнә тууҗар, келәр соньмсад, тер улсин эв-арһ хәәдм. Тен дотр, келән гееҗәх мадна. Эн болхла мадна сойлар арсм көөхәс биш, талдан санан уга. Энинь бәәтхә, мана нег хальмг күүкд күүнд келҗ: Мини нильчар тадниг, Хальмгудиг, делкә медҗәнә – гиҗ. Ямаран ик санан эн. Мана өөрд-хальмг дуд орчлң соңгсад медәд авчкла, тер гергн угаһар. Мана Җаңһрчин Цаһан Замин күчәр. Тиигчкәд дуулҗах дууллһнь, дәрк-дәрк – көндә күв (бак, бочка). Төмр ик күвд өкәһәд хәәкрҗ үзит – мел тиим ә һарх. Тер дуунд орулсн ухан-седклин, зовлңгин чигн, юн гиҗ келҗәхинчн медлго, хоосар аман аңһаһад, будсн нүдәрн бүрлзүлхәс юмн уга. Өрчдинь уга юмн, хооласнь һардм биш. Ода мана хальмг ду орс «цаһан күн» дуулҗана гиһәд мадн байрлад, харhцад үкхгов. Манад ирҗ дуулсн кевтә? Манахс одад җе гитлән ханлтан өргсн болх, мана өвкнрин зөөр йовдсн юмсудд күртҗәнә гиһәд. Нохчаулсд эн келн әмтнә дууч гиҗ ачлгдҗ. Ичкевт-ичкевт. Манахс бас тиигсн болхий? Энҗл цуг әрәсән әмтнә инглтн җил болҗ нерәдгдсн, нег үлү, мана баәдлтә келн әмтнә ухан-седклинь авлад, коочилххд эн гергн йир икәр дөнглҗәнә. Тер халхар бас мөңг олсн болхм. Йосн иргни (гражданский) ниигм (общество) бәәсн болхнь иим-иим юмсудиг шаглад зогсах биләвдн. Зуг ода сән-мууһинь, чик-буруһинь, үнн-худлынь йилһҗ чадҗах улсвдн. Зүүллдәд хуурцхаҗ икнкнь. Гемән сурҗанав, дегәд шүрүнәр келсн болхла. Күн һашуднал...