Тер мана Цааҗар, кү хулха-худлд харлхла, зуг илткх эш бәрмт (доказательство) уга болхла, тер харлгдсн күн, амн үгән өгәд, цеврдәд һардг бәәҗ. Эс гиҗ талдан тоомсрта күн, тер харлгдсн күүнәс түрүләд амн үгинь авад, эс кеснь медҗ авад, дааврт авдг (на поруки) бәәҗ. Зәрмдән ял ик болхла шаханд орулх. Тиигхлә зул өргәд, андһарлад тер зулан унтрадг бәәҗ. Хәрү үгән өгәд. 📣 Энүнд юн намаг ормадулна гихлә, күн амн үгән өгдгнь. Келсн үг тедү мет үнтә, күнд, күүндвртә бәәсн. Келсн хөөн, келснәсн цөкрш уга. Келв – күцәх.👍🏽 Тиигәд манахс кесг дәкҗ хаҗудк олн-келн әмтндән меклгдәд бәәсн мөн. Өдгә цаг чигн тиим йовдл үзгднә. Эргәд хәләһит – үзәд бәәхит. 🤔 Ода болхла, делкә толһалҗах юмсуд худл келәд, негл чирәдән ишкә наасн юмсуд. Эндр иигҗ келәд, нөкәдүр – талданар келәд, кесн-келсн уга биләв гиһәд гөрдәд, цәәлзәд бәәх. Ичр-һутр, му нерн гидг юмн мартгдҗ. 😭 Зуг делкән гөлм ода цуһарынь тодлад бичәд авад бәәнәлм. 🤷🏽‍♀️