Депутата асӑннӑ, Блогерсем пирки манман, Кам тата сиксе юлнӑ? О! Глава пирки - ҫырман! Эх, шӑпланчӗҫ хӑшӗсем, Пӑшӑл-пӑшӑл сӑмахсем. Пуҫлӑхсем кӗхӗм-кӗхӗм: «Доиграется Типшӗм». Веҫ йӳлӗ ярса чуна Тахҫанах сӑмах уҫман. Ма вӑрҫас-ха ман ӑна? Вӑл мана усал туман. Хӑнӑхман эп ятлаҫма, Ларччӑрах вӗсем ҫӳлте. Армансемпе ҫапӑҫма Ӗнтӗ кӑмӑл ҫук пӗртте. Тӑрӑшмас пулма ваҫ-ваҫ Пуринпе ҫак пурнӑҫра. Чи кирли - юрлаттараҫ Чӗререн ҫырнӑ юрра. Мӗн курни-тӳсни хальччен, Пӗр хама пырса тивет. Пилӗк теҫетке иртсен Лӑпкӑн пурӑнас килет. Ҫта лараҫҫӗ хуҫасем - Эп пӗлмес, кайса курман. Нумай ҫырнӑ юрӑсем - Пӗрре те ҫӑхав ҫырман! Телей курччӑр ентешсем, Улшӑнсан та пуҫлӑхсем. Сывӑ пултӑр, чечеклен, Чун юратнӑ Чӑваш ен! 24.03.2025 Шупашкар Типшӗм Сашук