Арцурли, андаличир Кӏайдяхӏибти нудбала ДяхІцӏи чегили хӀела, Детахъиб дагьри дила. Илдаур пархдикӏути Лямцӏана цӏа кадатур, Дила урла пикруми Палдаличи шурдатур. ХӀу дахъал дусми гӏергъи Чераири ишбархІи, Дисулри закир къургъи, БяргӀибсиванри берхӀи... Севан диши, дамсурлил ХӀулби ва нудби хӏела! Секьяйда кьерхӏдиублил Гъез цӏудара архӏяла? Мешулиригу, марли, Инсайчи хӀелбитӀунси, Агь, цІала арцан, муртрил Дила дигай датӀунси! Гъамиэс, гъайэс дила ХӀедаиб хӏял я ахъри. Севан декӏли рашулрил, Урцуси итцад ахъли... РурцІули, цӀубхъбикӏули, Изулил уркӏи севан, ДяхІлизи забра чейгур, Тяп дяхъилизи зеван. Вагьуррав ну, хӀегьуррав? ХӀерризурри хӀу лехӏли. ТӀашкаира вяхӏчили ХӀела агарси хъехӏли. Дугӏли цугрикири наб, Даимлис дяхъи аэс... Севан ухусирил ну ХІела уркӏи ветаэс... Итхӏелла хӀела дяхӏцӏи АхӀенара гьалабси? Някъбачиб бихиригу ХӀуни дунъя алавси. ХӀезибси цӏала арцан Сен батурри бебкӏахъес?.. Улас, хӀейишира ил ХӀезиб мицӏирбиахьес?                         АМИР ГЪАЗИ.