Тяп хӀечиван хӏяйрай гьалаб чичилра Гьачамалра нуни ахӏен хӀеръибси. ХӀезиван малхІямли, гьалаб чизилра Гьачамалра нуни ахӀен гъайибси. ЧӀянкІли хӀела мякьлав вирес мурталра, Дугира бархӀира дирбубра нуни. Амма хӀебаргира, се бараслира, ХӀела дунъялизи гъамиэс гьуни. ЧебхӀякьуси дуги кабикиб набчи, Ванзара зубрира сукъур-гІянцӏдиуб. Велсасли дугели къантӏси гьанкІличил, Чевиргъулра кахти дугӏла гӀянцӏлиув. Гьаман, гьанагарли, вайбарес кьасли, Житаливан, дила гьуни байбирхъид. Кьяшми дукуливан, рашули ласли, Дацӏти гӀяк-гІякличил дай уркӀи бирхъид. Рашунсигъунари вершадешличи, ТӀем агарси, рангла кагъарла вава... РахъхӀи калишира ламартдешличил Агъулабирули гьар бархӏи гьава? Дила ригайличил, тяп миъличивван, ТякикӀулра даим гьарил ганзлизив. РухІнарикили, хӀу атӀирил севан, Дила уркӀилизи, имсван кӀазлизи!.. Сен хӀеръира хӀечи, гъайира селис? Яра акӀубсирив хӀу наб балагьлис? АМИР ГЪАЗИ