Бүгүн Николай Тарскай аатынан спорт дыбарыаһыгар буулдьалаах саанан ытыыга Өрөспүүбүлүкэ кубогын II-с этаба ыытылла турар. Бу тэрээһин СӨ спордун маастара, спорт уонна ИДьМ бэтэрээнэ, подполковник Григорий Капитонович Ермолаев сырдык кэриэһигэр ыытыллар. Григорий Капитонович 1945 сыллаахха Курбуһах нэһилиэгэр төрөөбүтэ. Олоҕун устата эппиэтинэстээх үлэни уонна спорду бииргэ алтыһыннарбыт киһинэн буолар. Волгоградтааҕы Үрдүкү следственнай оскуоланы бүтэрэн, ис дьыала уорганнарыгар сулууспалаабыта. Григорий Капитонович «Макаров» бойобуой бэстилиэтинэн ытыыга өрөспүүбүлүкэ хас да төгүллээх чөмпүйүөнэ, Иркутскай, Чита, Хабаровскай, Воронеж куораттарга Сибиир уонна Уһук Илин зонатын күрэхтэһиилэригэр 4 төгүл бириистээх миэстэни ылбыта, Москва уонна Саранскай куораттарга Союз таһымнаах күрэхтэһиилэргэ икки төгүл кыттыыны ылбыта, буулдьалаах саанан ытыыга Саха өрөспүүбүлүкэтин спордун маастара, милиция туйгуна. Күрэх үөрүүлээх аһыллыытыгар улуус депутаттарын Сэбиэтин бэрэссэдээтэлэ Иннокентий Аммосов, Мүрү нэһилиэгин баһылыга Прокопий Румянцев, улуустааҕы буулдьанан ытыы федерациятын салайааччыта Геннадий Оллонов, ону тэҥэ Григорий Капитонович аймахтара кыттыыны ыллылар. Кыттыылаахтар Григорий Ермолаев олорон ааспыт олоҕун ахтан-санаан аастылар, итиэннэ бары күрэхтэһээччилэргэ чэгиэн туругу, дьулуурдаах буолууну уонна үрдүк ситиһиилэри баҕардылар. Улуус дьаһалтатын пресс-сулууспата.