Бүгүн Бороҕоҥҥо СӨ үөрэҕириитин туйгуна, тренер Иван Иванович Иванов сырдык кэриэһигэр аналлаах «Сааскы туллуктар» диэн чэпчэки атлетикаҕа өрөспүүбүлүкэтээҕи оҕолор күрэхтэрэ ыытылла турар. Иван Иванович 1949 сыллаахха Бороҕоҥҥо төрөөбүтэ. Дьокуускайдааҕы педучилище физкультураҕа салаатын бүтэрэн, Суотту орто оскуолатыгар чэпчэки атлетикаҕа тренеринэн үлэлээн, хас да көлүөнэ оҕону спорка угуйбута. Кини спортка ситиһиилэрэ олус киэҥ. Ол курдук Сибиир уонна Уһук Илин зонатыгар оҕолорго баскетболга үһүс миэстэ, Ф.Попов бирииһигэр кроска хас да төгүллээх призер, Саха сирин VII-с спартакиадатыгар 400 м. сүүрүүгэ уонна эстафетаҕа иккис миэстэ, нуучча шашкатыгар Россия спордун маастарыгар кандидат, «Азия оҕолоро» II-с норуоттар икки ардыларынааҕы оонньууларга чэпчэки атлетика хамаандатын салайааччыта. Маны сэргэ Иван Иванович дьиэ кэргэнин бүтүннүү спортка уһуйбутун билигин кини оҕолоругар көрөбүт. Ол курдук алта оҕото алтыан өрөспүүбүлүкэҕэ биллэр спортсменнар. Күрэх үөрүүлээх аһыллыытыгар улуус баһылыгын солбуйааччыта Алексей Тарасов, Мүрү нэһилиэгин баһылыга Прокопий Румянцев, ону тэҥэ Иван Иванович кэргэнэ Евдокия Иванова, оҕолоро кыттыыны ылан, Иван Иванович аатын үйэтитэр тэрээһиҥҥэ кыттыыны ыла кэлбит бары күрэхтэһээччилэргэ махталларын тиэртилэр. Күрэххэ 8 улуустан 80-тан тахса кыттааччы мустан оҕолор, улахан дьон уонна бэтэрээннэр икки ардыларыгар илин-кэлин түсүһэ сылдьаллар. Улуус дьаһалтатын пресс-сулууспата.