🌸“Сэргэх олох” кулууп кыттыылаахтара кэрэ аҥаардарын эҕэрдэлээтилэр Ийэ буолуу дьолун билбит күн күбэй ийэлэри, далбар хотуттары, килбик кийииттэри, кэрэ куолары сандал саас бырааһынньыгынан, Аан дойду дьахталларын күнүнэн "Сэргэх олох" кулууп сүбэтин эр дьоно Айаал Аргунов, Павел Аммосов эҕэрдэлээн, үөрүүлээх киэһэни тэрийдилэр. Эрдэ биллэриллибит сааскы кэм тиэмэтигэр сэлээппэ, төбөҕө кэтиллэр сиэдэрэй бэргэһэ куонкурсугар бары олус оҥостон бэлэмнэнэн, кэлбиттэр. Куонкуруска 1 миэстэни бэйэтэ баайбыт сэлээппэтинэн Ольга Местникова ылла, 2 миэстэҕэ эргэ кинигэ илиистэринэн оҥоһуллубут төбөҕө, илиигэ кэтэр киэргэллэринэн Марфа Васильева, 3 миэстэҕэ араас материаллартан сэлээппэтин олус кэрэтик киэргэтэн Полина Черкашина тигистилэр уонна анал бириистэри туттулар. Салгыы сатабыллаах хаһаайкалар дьиэлэригэр астаан аҕалбыт бүлүүдэлэрин көрүүтэ буолла. Кыайыы үөрүүтүн бу сырыыга саха битэмииннээх аһын дыраһааҥканы оҥорон Светлана Старостина биллэ. Кинини сэргэ Варвара Новогодина бүлүүдэтэ, Полина Черкашина вафлята, Ольга Местникова салаата биһирэннилэр. Бары кыттааччылар анал бириистэри тутан үөрдүлэр. ✍️Павел Аммосов, Мүрү нэһилиэгин "Сэргэх олох" кулуубун салайааччыта Сиһилии ⬇️ БАТТАА ✅ @uamurusahargata @ulusmedia