Tekin pishloq qopqonda boʻlmaydi DISKLEYMER: Hozir yozmoqchi boʻlgan tanqidiy postim shaxsiy fikrlarimga asoslangan, biriktirilgan qoʻshimcha manbalar esa isbot sifatida keltirilgan. Bu mavzuga 3-4 yildan beri duch kelaman. Bitta qiziq odatim bor, bir ishning toʻgʻriligini bilsam, oxirigacha boraman. Boshqalar xato qilmasligi, kerak boʻlsa aldanmasligi uchun oʻzimdagi nimadirdan ham kechaveraman. Hozirgi gaplashadigan mavzuyimiz: Treyding, Forex bozori va koʻzga chiroyli koʻrinuvchi soqqalar haqida. Tashqaridan koʻrgan inson havas qilsang boʻlmaydimi, oʻzing topolmagandan keyin boshqalarga yopishib nima qilasan deyishi mumkin. Uzrlik, nima deysiz endi. Bu vijdon degan jonivor juda yomon narsa ekan, quloq solmasang, kechalari uyqu ham bermas ekan. Kuniga $100-$1000-$10000 topishni kim ham xohlamaydi deysiz? Ayniqsa, bu pullar rosa nafs qurgʻurga yoqib tushadi-da. Treydingning halol yoʻnalishida ishlayotganlarga bu maqolam taalluqli emas. Ishingizga baraka bersin. Hammasi oddiy, broker orqali roʻyxatdan oʻtasan. Karta ulaysan. Nechtadir darslar koʻrib, sekin qandaydir dohiyona strategiyalar bilan FOREX bozorida savdo qilishni boshlaysan. Narx koʻtarilishi yoki tushishiga pul tikib, kerak boʻlsa $10 pulni $100 qilish mumkin. Zoʻr-a? Qimorga oʻxshab ketarkan-u, lekin nima boʻpti, aql ishlatib, qandaydir analizlar qilib, kechalari uxlamasdan savdo qilyapsiz, demak siz halol ishlab, peshana teringiz bilan pul topyapsiz. Oson kelmayapti-ku shundaymi) Bilib qoʻying, savdoda ikkala tomondan faqat bittasi zarar koʻradigan savdo toʻgʻri boʻlmaydi. Buni dalilini maqola pastida keltirib oʻtaman. 2-SKRINSHOTGA QARANG. Qandaydir fatvo hujjati va Forex halol deb yozilgan. Biroz aniqlashtiramiz. Hujjat Janubiy Afrika Musulmonlar konsulligi tomonidan FOREX savdosi joiz, agar barcha valyuta almashuvlari zudlik bilan NAQD holda amalga oshirilsa va kechiktirilmasa deyilgan. Baʼzi Forexchilar shu hujjatni olib, sodda xalqqa ishimiz halol deydi. Biz Janubiy Afrika Musulmonlar konsulligi fatvosi bilan ish qilmaymiz va butun dunyo musulmonlari bunga amal qiladi degani ham emas. ✅ Real vaqtda, foizsiz, leverage yoʻq savdo – SPOT savdo toʻgʻri boʻladi. Lekin Forex, Metatrader, Exness, Deriv, Quotex, XM'da brokerlar leverage (qarz) beradi, SWAP foizli kechiktirish ishlatadi, real valyuta emas, LOT bilan savdo qiladi. Pulingiz bormi, koʻpaytirmoqchimisiz? Investitsiya qiling aksiyaga, haqiqiy oltin sotib olishga, birorta odamlarga foyda keltiradigan biznesga. Bu ish bilan shugʻullanayotganlarga hozirgi gaplarimni aytsangiz, qulogʻi eshitmaydi, qalbi rozi boʻlmaydi. Oʻzlari bilishadi, hammamizni Oʻzi isloh qilsin. Manbalar: https://youtu.be/6iqcfIxrWrc?si=YMM0jj9Uav_tj1Az https://youtu.be/drGeYiDBxP0?si=5ZYrQyt-ZbzpomQK https://youtu.be/Zao0INvaYXQ?si=msnycwY3ORoSTdO7 https://t.me/IslomMoliyasi/1527 @ozbekchayoz