Чурапчы улууһугар РФ Судаарыстыбаннай Дуума Физическэй култуура уонна спорт кэмитиэтин бэрэссэдээтэлэ Олег Матыцин үлэлээтэ. Кинини кытта Ил Түмэн дьокутаата Георгий Балакшин, СӨ спорт миниистирэ Леонид Спиридонов, Судаарыстыбаннай Дуума кэмитиэт аппаратын сүрүн сүбэһитэ Ирина Прасканова уонна Приморскай край физкултуура уонна спорт миниистирин э.т. Дмитрий Граф сырыттылар. Улуу тириэньэр Д.П. Коркин аатынан Албан аат түмэлин, интэринээт-оскуоланы уонна институту көрдө-иһиттэ. Оскуола дириэктэрэ Станислав Захаров Улуу тириэньэр 100 сааһын көрсө, саҥа тутуллуохтаах спортивнай комплекс тутуутун өйүүрүгэр көрдөстө. Оттон институт преподавателлэрэ уонна устудьуоннар кэпсэтиһиигэ стипендия үрдээһинин, күрэхтэһиилэр бириистэрэ улааталларын, патриотическай иитии, бассейн тутуутун, о.д.а. ыйыттылар. Олег Матицын институт Арассыыйа спортивнай үөрэтэр эйгэтин эрэллээх чааһа буоларын бэлиэтээтэ, өссө да ситиһиилэр, кыайыылар кэлэ туралларыгар баҕарда.