💪 Валерий Аринкиҥҥа анаммыт «Дьоруой паартата» арыллыытыгар доҕоро Арассыыйа Дьоруойа Андрей Григорьев – Тута кыттыыны ылла ❤️ В.Н.Оконешников аатынан Нөөрүктээйи орто оскуолатыгар 2018 сылтан дойдуга саҕаламмыт «Биир ньыгыл Арассыыйа» баартыйа көҕүлүүр бырайыагынан оскуола выпускнигар, “Эр санаа уордьанынан”, «Хорсунун иһин» мэтээлинэн 3 төгүл наҕараадаламмыт анал байыаннай дьайыыга олоҕун толук уурбут Амина диэн позывнойдаах Валерий Васильевич Аринкиҥҥа анаммыт «Дьоруой паартата» арылынна. ❤️ Оскуола үөрэнээччилэригэр биир дойдулаахтарын ‒ Дьоруойдар сырдык ааттарын, килбиэннээх, хорсун быһыыларын санатар, үйэтитэр сыаллаах-соруктаах тэрээһиҥҥэ Валерий Васильевич ийэтэ Анна Ильинична Аринкина, бииргэ төрөөбүт балтылара Вера Васильевна, Елена Васильевна, аймах билэ дьоно уонна анал байыаннай дьайыы хонуутугар бииргэ сулууспалаабыт табаарыһа, доҕоро Арассыыйа Дьоруойа Андрей Николаевич Григорьев – Тута, нэһилиэгин уолаттара интранционалист-буойун, улуус, нэһилиэк бочуоттаах олохтооҕо, байыаннай дьайыы бэтэрээннэрин сэбиэтин салайааччыта Иван Дмитриевич Степанов, анал байыаннай дьайыы бэтэрээннэрэ Станислав Семенович Петров, Айнар Валентинович Слепцов кыттыыны ыллылар. 🙏 Бэлиэ тэрээһиҥҥэ Валерий Аринкин чугас дьонугар, аймахтарыгар улуус дьокутааттарын сэбиэтин бэрэссэдээтэлэ Иннокентий Андросов, үөрэх управлениетын начаалынньыгын солбуйааччы Филипп Стручков, нэһилиэк баһылыга Иван Старостин, оскуола дириэктэрэ Валерий Петров истиҥ иһирэх тылларынан махтаннылар. 🎖 Андрей Григорьев – Тута, Арассыыйа Дьоруойа: 🤝 – Валерий Аринкинныын сэриигэ бииргэ сылдьыбыппыт. Элбэх бойобуой сорудахтары бииргэ толорбуппут. Киһи быһыытынан бэйэтэ олус эйэҕэс этэ. Ханнык баҕарар балаһыанньаҕа мин киниэхэ эрэнэрим. Мин сэриилэһэн бүтэн кэлэрим саҕана Валерий салгыы сулууспалыы хаалбыта. Кэлин бииргэ сылдьар уолаттара кыргыһыы толоонугар охтубутун биллэрбиттэрэ. Онно доҕорум дьиэ кэргэнин, аймахтарын кытта эбэһээт көрсөн чиэстээн, ахтан, санаан ылыам диэн сыал туруорунаммын бүгүн кэллим. 🫡 Амина аҕаһас киһи этэ, дьоно да оннуктар эбит. Кыраттан үөрэллэр, ыараханы, кыһалҕаларын кэпсии сылдьыбаттар. Нөөрүктээйи нэһилиэгин бары олохтоохторугар маннык хорсун уолаттары иитэн таһаарбыккытыгар ис сүрэхпиттэн махтанабын, – диэн иһитиннэрдэ. Сиһилии ⬅️ @gazetaerkeii @ulusmedia 📲 "Эркээйигэ" MAX сыһыарыыга сурут.