Евангелие От Марка, которое будет читаться за богослужением в воскресение 9 / 22 марта: Зачало 40 *** И отвеща́в еди́н от наро́да, рече́, Учителю, приведо́х сы́на моего́ к Тебе, иму́щь дух нем. и иде́же коли́ждо и́мет его́, разбива́ет его́, и пе́ны тещи́т, и скреже́щет зубы́ свои́ми, и оцепенева́ет. и рех ученико́м Твоим, да иждену́т его́, и невозмого́ша; Он же отвеща́в ему́, глаго́ла, о ро́де неве́рен, доко́ле в вас бу́ду, доко́ле терплю́ вы; приведи́те его́ ко Мне. и приведо́ша его́ к Нему́, и ви́дев Его а́бие дух, стрясе́ его́. и пад на земли́ валя́ешеся, пе́ны теща́. и вопроси́ отца́ его́, коли́ко лет есть, отне́леже се бысть ему́; он же рече́, изде́тска. и мно́гажды во огнь вве́рже его́, и в во́ды, да погуби́т его́. но а́ще что мо́жеши помози́ нам, милосе́рдовав о нас; Ису́с же рече́ ему́, е́же а́ще что мо́жеши ве́ровати, вся возмо́жна ве́рующему. и а́бие возопи́в оте́ц отроча́те, со слеза́ми глаго́лаше, ве́рую Го́споди, помози́ моему́ неве́рию. ви́дев же Ису́с, я́ко сри́щется наро́д, запрети́ ду́ху нечи́стому, глаго́ла е́му, ду́ше немы́и и глухи́и, аз ти повелева́ю, изы́ди из него́, и ктому́ не вни́ди в него́. и возопи́в, и мно́го пружа́вся, изы́де, и бысть я́ко мертв, я́ко же мно́зем глаго́лати, я́ко у́мре. Ису́с же ем его́ за́руку, воздви́же его́, и воста́. и вше́дшу Ему в дом, ученицы́ Его вопроша́ху Его еди́ного, я́ко мы невозмого́хом изгна́ти его́; и рече́ им, се́й род ничи́мже мо́жет изы́ти, то́кмо моли́твою и посто́м. и отту́ду изше́дше, идя́ху сквозе́ галиле́ю. и нехотя́ше да кто увесть. уча́ше бо ученики́ своя́, и глаго́лаше им, я́ко Сын Челове́ческии, пре́дан бу́дет в ру́це челове́честе, и убию́т Его́. и убие́н быв, в тре́тий день Воскре́снет.