Гел яктыга гына омтыла, Керсез бит ул күңел дигәнең: Бүгенгесе булса болытлы, Иртәгесен кояш чыгар дип, Туар көннең көтә килгәнен. Гел биеккә генә омтыла, Бик хөр бит ул күңел дигәнең: Түбән төшсә бүген әгәр дә, Иртәгесен биек менәргә Туар көннең көтә килгәнен. Гел яхшыга гына омтыла, Оптимист ул күңел дигәнең: Җимерелсә дә бүген хыялы, Төзермен дип яңа дөньяны, Туар көннең көтә килгәнен. Хыялланыр өчен туктаусыз, Һаман шулай өмет итәргә - Ярый әле туар көннәр бар, Ярый әле килә Иртәгә!!! Фәнис Яруллин