О прекрасной весенней степи — к Дню калмыцкой поэзии 🌷🌷🌷 Хәләцим мини авлсн Хурдн мөрнә довтлһн; Хәврһәс генткн үләсн Хаврин дулахн салькн; Халун уурта шөлтә Хөөнә махна үнр; Холас герлән асхсн Харңһу сөөһин одд; Теегт идшлсн хөншң Теңгрин нүүсн үүлд; Баахн үүртәһән йовх Байрта күүкнә инәдн; Сө болһн ордг Соньн мини зүүдн, — Уханасм цуһар сәәхнәр Урдкин бәәдл татна. Хама йоввчн, нанд Хальмг Таңһч сангдна. Өңгрсн, ирх җирһл Өмнм бәәхәр үзгднә… Заясн нутгин тачалнь Зах угань медгднә. Шарлсн моддын орад Сууҗах нарна сүүр Ардасн намаг дуулдҗ Алтн төрскнүрм күргнә. КӨГЛТИН Дава 🌷🌷🌷 Дүмбр теегимм сәәхлә Дун уга тагчгч, Төвшүртә болчкад ичг Тевчңһү җөөлн седклтәч. Ухаһан танюлдг уга Уул хальмг авъястач, Эрк, саг, үрмтхә Элгсг теркә цогцтач. Адһм угаһар цоклсн Альвн итклтә зүрктәч, Чикләд хәләсән хәәлүлдг Чилм хар нүдтәч. « – Бамб цецгәт», – гиҗ Би таниг өкәрлнәв; « – Халхасчн үмсхинь», – гиҗ Халурхҗ дотран бүтнәв МУУШАН Һәрә 🌷🌷🌷 Әрүн мини хальмг теегәрм Әмтәхн нег булг урсна. Ундан терүнәс цуг делкә Ууҗ хәрүлх гиҗ саннав. Тер булг — хальмгин седкл — Теегләһән әдл сарул, тиньгр. Бикчдх гиҗ бичә сантн, Бийстн ирәд, булгас уутн. БАЙДЫН Санҗара