Бүген Татмедиа АҖ брифинг залында «Салават күпере» журналын методик әсбап буларак куллануга багышланган махсус конференция узды. Конференция оештыруның төп сәбәбе – 2025 елның апрель санында игълан ителгән «Уеннар сандыгы» конкурсы. Конкурс шартлары буенча балалар бакчалары тәрбиячеләре үзләренең эшчәнлекләрендә «Салават күпере» журналын ничек кулланулары турында видеоматериаллар тәкъдим итәргә тиеш иде. Конкурска республиканың төрле почмакларыннан 50 эш кабул ителде. Жюри әгъзалары барлык гаризаларны җентекләп өйрәнеп, иң кызыклы һәм нәтиҗәле 14 тәҗрибәне сайлап алды һәм истәлекле бүләк тапшырды. Чара өстәл артында чәй эчү белән тәмамланды.