💞50 сыл бииргэ олорбут ытык-мааны ыал Сунтаар улууһун Күүкэй нэһилиэгин ытыктанар олохтоохторо Розалия уонна Федор Федоровтар 1976 сыллаахха Дьокуускай куорат Сэргэлээх уопсайыгар көрсөн сүрэхтэринэн сөбүлэһэн, харахтарынан хайҕаһан ыал буолан олорбуттара номнуо 50 сыл буолла. Розалия Ивановна учуутал идэтин баһылаан Сунтаар улууһун Кутана, Күүкэй нэһилиэктэрин орто оскуолаларыгар 40 сыл устата үрдүк категориялаах физика учууталынан үлэлээбитэ. СӨ үөрэҕириитин туйгуна, СӨ Учууталларын учуутала, СӨ үөрэҕириитин систематын бочуоттаах бэтэрээнэ, Арассыыйа үлэ бэтэрээнэ. Розалия Ивановна остуол тенниһэ спорт көрүҥэр улуус, өрөспүүбүлүкэ күрэхтэһиилэрин чемпиона, улуустааҕы волейбол күрэхтэһиилэригэр учууталлар сборнай хамаандаларын сүрүн кыттыылааҕа буолар. Федор Степанович Күүкэй нэһилиэгин баһылыгынан 16 сыл устата төрөөбүт нэһилиэгин сайыннарыыга дьаныардаахтык үлэлээн ааспыта. Кини үлэлиир кэмигэр араас социальнай объектары туттаран үлэҕэ киллэрбитэ, нэһилиэк сайдарыгар улахан кылаатын уурбута. Федор Степанович СӨ муниципальнай сулууспатын бэтэрээнэ, СӨ норуот хаһаайыстыбатын үтүөлээх үлэһитэ, Сунтаар улууһун бочуоттаах олохтооҕо, "Гражданскай албан аат" бэлиэ хаһаайына. Бу наҕараадалар кини үлэтин ситиһиилэрин туоһулара буолаллар. Розалия Ивановна уонна Федор Степанович 4 оҕону күн сиригэр көрдөрөн, билигин 9 сиэн эйэҕэс эбээтэ уонна эһээтэ буолаллар. Кинилэр мэлдьи активнай позициялаах дьиэ кэргэн быһыытынан кэнчээри ыччаттарын үөрэххэ, үлэҕэ, үтүөҕэ үөрэтэн оҕолоро, сиэннэрэ ситиһиилээхтик үөрэнэ-үлэлии сылдьаллар. 🌟Федоровтар дьиэ кэргэттэрин "Семейная доблесть" СӨ Ил Дархана А.С. Николаев олохтообут бэлиэтинэн наҕараадаламмыттарынан ис сүрэхпититтэн эҕэрдэлиибит! Баҕарабыт чиргэл доруобуйаны, уһун дьоллоох олоҕу!💐 @sakhazags