Аҷаб хушбахтарин меϑ ят саропо ғарқэ ну рам нур. Хаёлум лӯм бағер Мусо ҷинов дар куйэ Турам нур. Насиб машарде Мавло чуд ху дидорат вэ хезандир, Саросар ас тамӯмэ гух̌айэ дунё узу рам нур. Фукаϑ маълум йи пӯнд машанд, айат озир Имӯм машанд, Узум айрӯн ку чизард ғал нафам тар ка та зурам нур. Ядет верӯн ху ад макам, Нурат х̌умне ху баъд макам, Ху аъмолат ху гуфторен фукаϑ якҷойа ҷурам нур. Дэ дӯнд амр ас Имӯм зезам амал фук ас дэ чидовард, Агар лап мис наёδд ас δуст йичиз иҷро пизу рам нур. Агар дар ройэ динам маш, агар мумин яқинам маш, Кинора ас ху зорδанд вет фукаϑ кибрат ғурурам нур. Ядет бо ам тифоқ савам, виродат ях ҷинов савам, Виродат яхҷинов якдигарард лап хах̌ зарурам нур. Агар иҷро ху Мавлоянд вэ фармунам, ди чуд ас дил, Сулаймӯнворта дар фармӯн фирих̌та то вэ мурам нур. Азор туфӯн бало ёδдат мэ дунё мис ца анҷивд хац, Наҷот ас Нуҳта ких̌тӣ ёδд агар фамат шуу рам нур. Ца савам амрэбардорат, ца анҷавам ху кирдорат, Ба даст йик диндэ ас Мавло фукаϑ хайрат хинурам нур. х̌абат меϑ Ҳақризо ар дил саноят зикрэ Мавлоям, Ху пӯнд равх̌ан мам оламтир фақат мис ас вэ ну рам нур. 11.02.2025 *