Сүрүн иһитиннэриилэр: ☑️Роспотребнадзор Намнааҕы салаатын кылаабынай исписэлиис-эксперэ Александра Попова иһитиннэрбитинэн, ➡️ улуус үрдүнэн сэбиргэхтэтэн ыалдьыбыт (внебольничная пневмония) – 5 киһи, онтон 3–һэ – оҕо; ➡️ис ыарыытынан (острая кишечная инфекция) – 4 киһи; ➡️салгын уоспатынан (Ветреная оспа) – 3 киһи, онтон 2-тэ – оҕо; ➡️дьиэ кыылытттан ытырыллыбыт (куоска, ыт) – 2 киһи. ☑️Намнааҕы киин балыыһа кылаабынай бырааһын солбуйааччы Вера Атласова иһитиннэрбитинэн, ➡️ааспыт нэдиэлэҕэ стационарга 86 киһини эмтээбиттэр, ол иһигэр – 18 оҕо. Нэдиэлэ устата 72 киһи (15 оҕо) киирбит. ➡️ 116 киһи суһал көмөҕө наадыйбыт, ол иһигэр — 45 оҕо. ➡️1 киһи – суорума суолламмыт. Диагноһа: Инсульт кэнниттэн сэбиргэхтэтэн ыалдьыбыт. ➡️Билиҥҥи туругунан улуус үрдүнэн диспансеризация былаана 24,17% туолбут. ➡️ Кулун тутар 24 күнүгэр исписэлиистэр (окулист, невролог, гинеколог, лор, психиатр, стоматолог, хирург, эндокринолог) И.Е. Винокуров аатынан Хатыҥ Арыы орто оскуолатыгар уонна Н.С. Охлопков аатынан Намнааҕы гимназияҕа тахсан үлэлээбиттэр. ➡️Стоматолог быраастар нэдиэлэ устата 2-с Хомустаах нэһилиэгэр тахсан үлэлээбиттэр. Бу нэдиэлэҕэ, былаан быһыытынан, кулун тутар 30 күнүттэн нэдиэлэ устата Хатырык нэһилиэгэр үлэлиэхтэрэ. ☑️23 №-дээх Намнааҕы ОГПС салайааччыта Иван Винокуров баһаартан сэрэтии үлэ былаан быһыытынан бара турар диэн иһитиннэрэрдэ. Санатан эттэххэ, баһаары сэрэтэр АДПИ тэрилин улуус үрдүнэн хас биирдии ыалга 100 % туруорары олунньу ыйга хонтуруолга ылбыттара. Соруктарын толоруутун туһунан: ≪Кыра нэһилиэктэргэ быһа холоон 100% буолла, улахан нэһилиэктэргэ өссө да сорук толору туоларыгар үлэлэһэ сылдьабыт≫ – диэтэ. ☑️Үөрэх управлениятын салайааччыта Мария Игнатьева иһитиннэрбитинэн, үһүс чиэппэр түмүктэммит, кулун тутар 28 күнүттэн муус устар 5 күнүгэр диэри –каникул. Каникул бириэмэтигэр 9-с уонна 11-с кылаастарга консультациялар ыытыллаллар. Маны таһынан элбэх тэрээһин, күрэхтэһиилэр буолаары тураллар диэн эттэ. Ол курдук, сарсын, кулун тутар 31 күнүгэр, ≪Дроннары куоталаһыннарыыга Үөрэх уонна билим министиэристибэтин Кубога≫ буолаары турар. Манна өрөспүүбүлүкэ араас муннугуттан уопсайа 20 хамаанда кытта кэлэрэ күүтүллэр. ☑️Тыа хаһаайыстыбатын управлениетын салайааччыта Владимир Макаров иһитиннэрбитинэн, бу ааспыт нэдиэлэҕэ Тыа хаһаайыстыбатыгар саҥа механизм тула мунньах түмүгүнэн, сарсын, кулун тутар 31 күнүгэр, Бэстээххэ буолар түмүктүүр стратегическай сессияҕа 4-с барыйаан эбиэххэ диэн бэйэлэрин этиилэрин киллэриэхтээхтэр. Маны таһынан, ааспыт субуотаҕа, кулун тутар 28 күнүгэр, Салбан нэһилиэгэр 22-с сылгы базатыгар уот ситимэ тардыллан үөрүлээх холбонуута буолбутун иһитиннэрдэ. Владимир Иванович, бэлиэтээн эппитинэн, уопсайа 16 сайылыкка, 8 хотоҥҥо, 22 сылгы базатыгар уот киирбит. «Нам улууһа» МО Пресс-сулууспата