⤵️⤵️⤵️⤵️⤵️⤵️⤵️⤵️⤵️⤵️⤵️ Кулун тутар 14-15 күннэригэр Дьокуускай куоракка, "Модун" спортивнай киин уораҕайыгар саха төрүт үгэстэрин кэрэтин көрдөрөр чороон, ох саа уонна кыл кырыымпаны оҥорор уустар «МАС УУСТАРЫН ТОЙУГА» III Өрөспүүбүлүкэтээҕи күрэх бэстибээллэрэ ыытылынна. Быйылгы күрэх СӨ уонна РФ үтүөлээх үлэһитэ, СӨ искусствотын үтүөлээх үлэһитэ, П.А.Ойуунускай аатынан Судаарыстыбыннай бириэмийэ лауреата, СӨ Норуодунай маастара, Эрнст Александрович Алексеев 80 сааһын көрсө сырдык аатыгар ыытылынна. Кыттааччылар икки күн устата дьүүллүүр сүбэ уонна көрөөччүлэр иннилэригэр уһанан көрдөрдүлэр, маастарыстыбаларын бигэргэттилэр. Ирдэбил быһыытынан, оҥоһуу маастарыстыбата төрүт үгэһи тутуһуу буолар. Горнай улууһуттан Бэрдьигэстээх кииниттэн икки чороон маастардара Артем Трофимов, Алексей Максимов уонна саҥа саҕалааччы Николай Ковров, кыл кырыымпа оҥоруутугар Игорь Аргунов күрэхтэстилэр. Икки күннээх күрэх түмүгүнэн Алексей Максимов III бочуоттаах миэстэҕэ тигистэ. Күндү маастарбытын улахан ситиһиигинэн эҕэрдэлиибит. Күрэххэ кыттыыны ылбыт дьоммутугар, маастардарга салгыы ситиһиини баҕарабыт. Маны тэҥэ икки күн устата уран тарбахтаах маастардар оҥоһуктарын быыстапкалара, кыл кырыымпаҕа маастар кылаастар ыытылыннылар. СӨ норуотун маастара, кыл кырыымпаҕа уонна ох саа кылга маастара Руслан Габышев ураты тыыннаах доҕуһуолунан бэстибээли киэргэ. Бу өрөспүүбүүүкэтээҕи күрэххэ оҕолор кыттыыны ылаллара олус кэрэхсэбиллээх. Иккис сылын "Айыы кыһата" оскуола үөрэнээччилэрэ кыттыыны ылаллар. Быйылгы да күрэххэ кыайыы өрөгөйүн биллилэр. Өбүгэлэрбит төрүт үгэстэрин умнубакка, эдэр ыччаппытыгар иҥэрэн хааллардахпытына, саха омук буоларбытын сүтэрбэккэ илдьэ сылдьарбыт, киэн туттуубут буолар. Анастасия Васильева - Сэмэн уонна Суппуруон Даниловтар ааттарынан Духуобунас киинин - Олоҥхо дьиэтин уус - уран салайааччыта. ⤴️⤴️⤴️⤴️⤴️⤴️⤴️⤴️⤴️⤴️⤴️