Биһиги хампаанньабыт бу күннэргэ Дьокуускайга саҕаламмыт Үөһээ Бүлүү улууһун үөрэҕэриитин ситимин 150 сылын бэлиэтиир «ҮӨРЭХ-БИЛИИ БИҺИГЭ - ҮӨҺЭЭ БҮЛҮҮ» дьоро тэрээһинигэр көхтөөх кыттыыны ылар. Сахаттан бастакы ССРС норуодунай учуутала,саха ыччата үөрэхтээх буоларыгар дьоһун суолу хаалларбыт Михаил Андреевич Алексеев сырдык аатын кэриэстээн биир дойдулаахтара кини мэҥэ тааһыгар сүгүрүйдүлэр, сибэкки, венок уурдулар. Арчы дьиэтигэр бу дьоһун күҥҥэ анаан-минээн Алгыс ытык сиэрэ-туома буолла. Үөрэх-билии салаатын бэтэрээннэрин кытта көрсүһүүнү Үөһээ Бүлүү баһылыгын Валерий Николаевы тэҥэ биһиги хампаанньабыт салайааччыта, «Хотун Бүлүү» түмсүү салайааччыта Ольга Григорьева- Туналы Урсун көҕүлээн ыыттылар. Манна истиҥ-иһирэх сэһэргэһии, сылаас тыыннаах алтыһыы тахсыбытттан дьон олуһун астынна. Улуус уран тарбахтаахтарын быыстапката турда, дьон хараҕын сымнатта, маастародар үлэлэрин кэрэхсээтэ. Манна биир дойдулаахтарбыт биһиги хампаанньа оҥоһуктарын хамаҕатык ыллылар. Үөһээ Бүлүү Дархан оһуохайдьыттарын уонна кэскиллээх этээччилэрин улахан оһуохайа биир дойдулаахтары түмтэ, куттарын тутта, сүргэлэрин көтөҕүөн көтөхтө. Дойду ахтылҕана, төрөөбүт түөлбэҕэ таптала, сүгүрүйүүтэ барыбытын сылааһынан кууста, үтүө санааны үксэттэ, умнуллубат ураты түгэни бэлэхтээтэ. Үбүлүөй тэрээһинэ билигин да икки күн салҕанан барыаҕа уонна кулун тутар 31 күнүгэр Суорун Омоллоон аатынан опера уонна балет театрын сыанатыгар улахан түмүк тэрээһининэн өрөгөйү бэлиэтиэ. 🔽🔽🔽🔽🔽🔽🔽 https://max.ru/id143509303731_biz/AZ05ul_9Pjo