«Иры Стыр Ныхас»-ы уӕнгтӕ сӕ хъуыдытӕ загътой ирон чъиритыл «Король и Шут»-ы рекламӕйы фӕдыл 🔻Тагъд фенӕн уыдзӕн киноныв «Король и шут. Навсегда». Уый фӕдыл «Пятерочка»-йы райдыдтой кинонывӕй ис ныхӕстимӕ цӕттӕ хӕринӕгтӕ уӕй кӕнын. Уыцы базайрӕгтӕм бахауд фыдджын дӕр. Чъириимӕ къоппыл фыст ис зарӕг «Ели мясо мужики»-йӕ ист хъуыдыйад: «Но скажите, правда, вкусная она?». Зарӕджы сюжет у ахӕм: дзаджджын фынгтыл бадгӕйӕ, нӕлгоймӕгтӕй иу иннӕтӕн дзуры, йӕ цардӕмбал уазджытимӕ цъаммар митӕ кӕй кодта, уый. Кӕронбӕттӕны сӕ фӕрсы, сылгоймаг сӕ зӕрдӕмӕ фӕцыд ӕви нӕ, уымӕй. «Иры Стыр Ныхас»-ы зӕрдӕмӕ ахӕм акци нӕ фӕцыд. Фидарӕй зӕгъынц, бизнес аразгӕйӕ, адӕм табуйагыл цы нымайынц, уый зӕрдыл дарын ӕмӕ хынцын кӕй хъӕуы, уый. 💬 «Ирон чъиритӕй хъӕуа-нӕ хъӕуа пайда кӕнын нӕ хъӕуы. Махӕн кувинӕгтӕ сты ӕмӕ цы ӕмбӕлы ӕмӕ цы не 'мбӕлы, уый хъуамӕ ӕмбарой. Исчи исты куы нӕ фӕзоны, уӕд та бафӕрсын дӕр ӕмбӕлы», — зӕгъы «Иры Стыр Ныхас»-ы сӕрдары хӕдивӕг Кучиты Руслан. Кучиты Руслан фӕсидт хицаудзинады оргӕнтӕм дӕр, цӕмӕй ахӕм фарстатӕм сӕ хъус дарой. 💬 «Куыд мӕм кӕсы, афтӕмӕй "ирон чъири" зӕгъгӕ, ӕмбарынад закъонмӕ гӕсгӕ ныффидар кӕнын хъӕуы. Кӕй куыд ӕмӕ цы хуызы фӕнды, афтӕ дзы пайда кӕнын нӕ хъӕуы. Уый нын сӕйрагдӕр у. Уыцы хъуыддагмӕ та хъуамӕ кӕсой депутаттӕ, алы ведомствоты разамонджытӕ, ӕхсӕнадон архайджытӕ. Иумӕ нӕ бон уыдзӕн бӕлвырд уынаффӕты сӕрыл рахӕцын», — бафиппайдта Кучиты Руслан. ⚫️ Дæхи «СапÆ»-йыл бафысс