ИЙТ ЭМ КОРАЗ. Бир авылда карт пан куртка яшаганлар. Ас- сувлары оьлшевли болган, сога коьре оларды сак болып кулланганлар . Азбарында бир ийт пен кораз болганлар. Карт пан куртка оларды суьйгенлер. Ас- сувлары оьлшевли болса да, ийтке эм коразга асты, эплерине коьре, заманы ман бергенлер. Парахатлыкта яшаганлар. Себеби неден- белгисиз,, тек ийт пен кораз  бир куьн , иелерин билдирмей , каранъа  танъ ман азбардан шыгып, авлакка кетедилер. Куьндиз кенъ авлакта кыдырып юргенлер. Кеште бир уьйкен  теректинъ янына келедилер. Аш болганлар, тышаймага заман келген. Каранъа кеше кораз теректинъ йогары бутагына конады. Ийт болса, теректинъ туьбиндеги уьнъиге кирип ятады. Аьйлежи туьлки сав кеше кыдырып юреди. Танъ атканда , уьйкен  теректи коьреди, ога ювыклайды. Теректе кораз конып туры. Туьлки, коразды коьрип, суьйинеди. Терекке  янасып келип, оны ман соьйлейди, ерге туьс деп, алдар соьзлерин айтады. Кораз: - Мен ялгыз  тувыл. Меним йолдасым бар. Туьлки тагы да суьйинеди:" Эки кораз экен",- деп. Аьйлежи  туьлки теректинъ туьбинде, ийискеленип,изленеди. Теректинъ уьнъисин коьрип, ога басын тыгып карайды. А ийт сак болып  карап турган экен. Тез атылып, туьлкидинъ басыннан ыслайды, оны куьшли талайды. Туьлки кашады. Кораз  аман калганларына суьйинип: " Уьйге кайтайык,"- дейди. Аш та болып,азбарларына, карт пан курткага кайтып келедилер. Иелери олардынъ кайтканларына бек суьйинедилер.