Чурапчы улууһун дьаһалтатын планеркатыгар ааспыт нэдиэлэҕэ ыытыллыбыт үлэлэр ырытылыннылар, саҥа нэдиэлэҕэ былааннар торумнаннылар. Ол курдук ааспыт нэдиэлэҕэ Дьокуускайга улууспут төрүттэммит бэлиэ күнүнэн "Алаас ахтылҕана" тэрээһиннэрэ үрдүк таһымнаахтык аастылар. «Молодой учитель образовательного округа «Заречье» - 2026» диэн куонкурус кылаан кыайыылааҕынан Кытаанах орто оскуолатын историяҕа уонна обществознанияҕа учуутала Кардашевскай Александр Данилович буолла уонна кини Татариновтар педагогическай династияларын «Учитель ученического выбора» номинацияларын бириэмийэтинэн наҕараадаланна. Планеркаҕа Чурапчы уонна Томпо оройуоннарын бочуоттаах киһитэ, Социалистическай Үлэ Дьоруойа, норуот хаһаайыстыбатын үтүөлээх үлэһитэ Василий Михайлович Кладкин 95 сааһыгар аналлаах үбүлүөйдээх тэрээһиҥҥэ улуустан бэрэстэбиитэллэр баран кыттан, Чурапчы дьонун-сэргэтин аатыттан эҕэрдэни тиэрдэн кэлбиттэр. Эһиил Ньурбаҕа ыытыллар спартакиадаҕа, "Дыгын оонньууларыгар" сүүмэрдиир күрэхтэһиилэр, бэлэмнэнии күүскэ бара турар. Истибэт дьон икки ардыларыгар спорт үс көрүҥэр күрэхтэһиигэ Чурапчы улууһа 3 миэстэни ылбыт. Чурапчытааҕы Агротехническэй колледжка студеннарын "Бастыҥ сварщик" күрэхтэһиилэригэр кыайбыт Василий Седалищев сенатор Егор Борисов бирииһин сварочнай аппараты тутта. Чурапчыга Госдума физическэй культура уонна спортка кэмитиэтин бэрэссэдээтэлэ Олег Матыцин салайааччылаах делегация Д.П.Коркин аатынан спортивнай интернат-оскуолаҕа, аатырбыт тириэньэр албан аатын үйэтитэр музейга сылдьан, улуус спордун эйгэтин билсэн ааспыт. Ааспыт нэдиэлэҕэ Алаҕар оскуолата 95 сылын бэлиэтээбит. Быйыл хас да оскуола үбүлүөйдээх тэрээһиннэрэ буолаллар. Саҥа нэдиэлэҕэ Чыаппара эр дьонун хорун үбүлүөйдээх тэрээһинэ Дьокуускай куоракка ыытыллыа. Улуус баһылыга Степан Саргыдаев "Дыгын оонньууларыгар" сүүмэрдиир күрэхтэһии иннинэ сүбэ мунньаҕы ыытыа. Салгыы муус устар 3-5 күннэригэр "Дыгын оонньууларын" өрөспүүбүлүкэтээҕи сүүмэрдиир күрэхтэһиитэ ыытыллыа. Салгыы "Айыллаан" киинэ тыйаатырын төрөөбүт күнэ, "Хаар айан" күрэхтэһии уо.д.а. курдук араас өрүттээх күрэхтэһиилэр үлэ былааныгар киирдилэр. Планеркаҕа полиция отделын сводката, "Тимченко фондатын", "Потанин фондатын", "Агротуризм" хайысхаларынан бырайыактары олоххо киллэриигэ нэһилиэктэртэн сайаапкалары кэмигэр туттарыы туһунан баһылыктарга туһаайыллыбыт иһитиннэрии оҥоһулунна.