Халхын Гол. Ямар ушараар али хэзээ үнгэрһэн дайнай ушар байдал Буряад орондо хүн зониие хүлгүүлээ һэм, үнишье болоогүйл даа, мартагдаагүй. Энэ хадаа Буряад театрай тайзан дээрэ мүндэлһэн зүжэг бэлэй. Тиихэдээ монгол хэлэн дээрэ. Энэмнай баһал түрүүшынхиеэ юм бэшэ аал даа, Монголой болон Буряадай театрнуудай хамтын тоглолтонууд яһала болодог байгаа, нэгэ зүжэгтэ суг наадаха ушар. Энэ зүжэгэй мүндэлһэн ушар шалтагаан гэбэл, Наран зүгэй булимтарагшадтай Халхын гол шадарай байлдаануудай илалтаар дүүрэһээр 85 жэлэй алдарта ой үнгэрһэн жэл гүйсэжэ, тэндэ Эхэ оронойнгоо абаралда арбаадтайхан ами наһаяа үргэһэн залуухан басагадай хуби заяа харуулһан «Халхын гол. Тангариг» гэжэ зүжэгые манай драматург Геннадий Башкуев бэшэһэн, манай театр тэрэ зүжэгөө тайзан дээрээ табихадаа хүршэ Монгол ороноо, тэрэ байлдаанда хабаадаһан залуухан басагадай баатаршалга хүндэлжэ монгол хэлэн дээрэ наадаха шиидхэбэри абаа бэлэй. Зүжэгнай амжалтатай һайханаар бүтэжэ, хоёр оронойнгоо тайзанууд дээгүүр урагшатай һайн тоглолтонуудые үнгэргөө һэн. Тэрэ үедэ оройдоол 15-тай ябаһан Цэрэнгийн Чимэдцэрэн мүнөө үндэр наһатай, Монгол ороноор үнгэрһэн тоглолтонуудаймнай гол айлшан байһан ушар зүжэгыемнай үшөө хэдэн шата дээшэнь үргэһэн гэжэ арсаангүйл даа. Мүнөө театрнай Буряадайнгаа харагшадтай дахинаа монгол хэлээрээ харилсахаяа бэлдэжэ байна, тиигэжэ Оросой театрнуудай дээдын шагнал болохо «Алтан багта» хүртэһэн зүжэгөө апрелиин 8-да 18 саг 30 минутаһаа хараха аргатай болобот. Найруулан табигша – театраймнай уран һайханай хүтэлбэрилэгшэ Олег Юмов. Хэлэндээ ядаралдахаб гэжэ һанаһан харагшадта ород хэлэн дээрэ оршуулгань шэхэнэй түхеэрэлгээр сэхэ дамжуулагдажа байха. 🎟 Таһалбаринуудые burdram.ru буудал соо абагты Наһанай хизаарлалта: 12+  Театрай Чат-бот Телеграм соо Таһалбари наймаалдаг газарай утаһан: 222-537 Пушкинай карта хүсэндөө #буряадтеатр_афиша 📱 Буряад театр в MAX