Тиныбджэгъу цIыкIухэр! Шъощ пае мэкъэгъэIу! Адыгабзэр зикIасэхэм зэнэкъокъокъоу «Сыбзэ сидунай» зыфи1орэр блэшъумгъэкI, шъукъыхэлажь! ИщыкIагъэр усэ е рассказ пычыгъо 1упкIэу, дахэу, зэгъэфагъэу укъеджэныр ары! Фондэу «ГУХЭЛЪ – GUKHEL» ык1и культурэмкIэ Адыгэ Республикэм и Министерствэ зэгъусэхэу, Адыгэ республикэ кIэлэцIыкIу тхылъеджапIэр яIэпыIэгъоу мы зэнэкъокъур зэхащагъ. Хэлэжьэн зылъэкIыщтхэр илъэси 4-м щегъэжьагъэу илъэс 17-м нэс зыныбжь кIэлэцIыкIухэр ары. Зэнэкъокъущтхэр номинацием елъытыгъэу гощыгъэщтых, куп пэпчъ осэшIхэм апэрэчIыпIищыр зэратыщтыр агъэнэфэщт.   Зэнэкъокъум ухэлэжьэным пае видеоролик тепхын фай. Ащ уикъэбар кIэкI, пцIэ, плъэкъуацIэ, узщеджэрэр, узщыпсэурэр къыщыпIотэщт ык1и усэ е рассказ цIыкIу укъыщеджэщт. Видеор Положением елъытыгъэу техыгъэн фае. Зэнэкъокъум иПоложениер Адыгэ республикэ кIэлэцIыкIу тхылъеджапIэм исайт къыщыбгъотыщт.   Видеороликыр мэлылъфэгъум и 14-м блэмыкIэу зэнэкъокъум изэхэщакIо Адыгэ республикэ кIэлэцIыкIу тхылъеджапIэм къэбгъахьын фай konkurssybze01@yandex.ru. ТекIоныгъэ къыдэзыхыгъэхэр жъоныгъуак1эм и 25-м 2026-рэ илъэсым блэмыкIэу Адыгэ республикэ кIэлэцIыкIу тхылъеджапIэм, къ. Мыекъуапэ ур. Ветеранов, 241 тетым щагъэшIощтых.