👋 Salom, do‘stlar! Bugun sizlar bilan biz Atom texnologiyalari axborot markazida (ATAM) tashkillashtirilayotgan qiziqarli tadbirlarimiz bilan bo'lishmoqchimiz! 💉2026-yil 28-mart kuni ATAMda turli davlat idoralari mutaxassislari ishtirokida O‘zbekiston Respublikasida yadro tibbiyotini rivojlantirish istiqbollariga bag‘ishlangan qiziqarli seminar bo‘lib o‘tdi. Seminarning asosiy ma’ruzachisi O‘zbekiston Respublikasi Sog‘liqni saqlash vazirligining bosh radiologi, tibbiyot fanlari doktori, professor Damir Arifovich Zaredinov bo‘ldi. U o‘z chiqishida yadro tibbiyotining bugungi kundagi keng imkoniyatlari haqida batafsil so‘z yuritdi. Jumladan, radionuklid diagnostika va davolash usullari, PET/KT (Pozitron Emissiya Tomografiyasi - Kompyuter Tomografiyasi) texnologiyasi, radiofarmatsevtik preparatlar, shuningdek, siklotron, gamma-pichoq va kiber-pichoq kabi zamonaviy yuqori texnologik uskunalarning ahamiyati haqida tushuntirib berdi. Ayniqsa, onkologik va boshqa ijtimoiy ahamiyatga ega kasalliklarni erta aniqlash hamda samarali davolashda yadro tibbiyotining o‘rni alohida ta’kidlandi. 🔬🧪Ma’ruzachi O‘zbekiston Respublikasi Prezidenti Shavkat Miromonovich Mirziyoyevning qo‘llab-quvvatlovi tufayli mamlakatimiz sog‘liqni saqlash tizimiga ilg‘or yadro texnologiyalarini joriy etish uchun keng imkoniyatlar yaratilayotganini qayd etdi. Muhim tashabbuslardan biri sifatida rossiyalik hamkorlar bilan birgalikda Toshkent shahrida zamonaviy Yadro tibbiyoti markazini tashkil etish loyihasi amalga oshirilayotgani ta’kidlandi. Rejalarga ko‘ra, 2026-yilda mazkur markaz PET/KT, siklotron, radiofarmakologiya laboratoriyasi, shuningdek, “Gamma-pichoq” va “Kiber-pichoq” uskunalari bilan jihozlanadi. Bu esa aholiga aniq diagnostika va innovatsion davolash usullaridan foydalanish imkoniyatlarini yanada kengaytiradi. Seminar davomida qizg‘in savol-javob va fikr almashuv bo‘lib o‘tdi. Unda olimlar, radiatsiyaviy texnologiyalar ishlab chiquvchilari, sanoat va tibbiyot vakillari O‘zbekistonda yadro tibbiyotini yanada rivojlantirish bo‘yicha o‘z fikr va takliflarini bildirdilar. Ishtirokchilar kadrlar tayyorlash, radiatsion xavfsizlikni ta’minlash hamda yadro texnologiyalarini amaliy sog‘liqni saqlashga keng joriy etishda xalqaro hamkorlik, jumladan, MAGATE va yetakchi xorijiy markazlar bilan aloqalar muhim o‘rin tutishini alohida qayd etdilar. 💡Tadbir yakunida yana bir qiziqarli chiqish ham bo‘lib o‘tdi. Moskvadagi MMFI MTYaUning aspirantlari Muzafarov Anvar hamda Ata-Kurbanova Ferangiz ishtirokchilarga atom sohasining noenergetik qo‘llanilishi haqida batafsil so‘zlab berishdi. Ular atom texnologiyalari nafaqat energetikada, balki tibbiyot, qishloq xo‘jaligi, sanoat, ekologiya va ilmiy tadqiqotlarda ham keng qo‘llanilishini misollar bilan tushuntirdi. Seminar barcha uchun qiziqarli va foydali bo’ldi. Unda yadro texnologiyalarini sog‘liqni saqlashda keng qo‘llash bo‘yicha foydali fikrlar bildirildi.